NASKAH PIDATO
BASA JAWA BANYUMASAN
JUMBARA 2013
PMR NYENENGNA PISAN
SMP NEGERI 2 PURBALINGGA
JUNI 2013
Assalamu�alaikum.wr.wb
Bapak lan ibu juri ingkang kula hormati lan kanca-kanca sing nyong tresnani lan banggakna. Mayuh pada bareng-bareng manjatna puji syukur dhumateng Gusti Allah sing wis paring waras, sehat slamet, ndadekna inyong kabeh bisa ketemu nang acara Jumbara tahun kie.
Sedurunge ngomong akeh inyong njaluk ngapura neng ngarep, sebab dina kiye nyong madan gemagus wani ngomong, wani pidato neng ngarepe wong sing mesthi lewih pinter tinimbang inyong. Abot-abote inyong nang kene olih tugas kon crita bab kegiatan PMR nang SMPne nyong.
PMR kuwe cekakan sekang Palang Merah Remaja. Sapa-sapa wis ngerti yen lamona Palang Merah kuwe organisasi pitulung sing ora mung neng Indonesia thok. Neng saben negara presasat ana organisasi Palang Merah. Kegiatane mbantu, ngenthengna bot ribete warga sing lagi sengsara. Conto sing genah angger ana banjir, kebakaran, tanah longsor, lindhu, gunung njeblug lan liyane. Organisasi Palang Merah mesthi melu kethebang-kethebang nulung. Adoh-perek, lanang-wadon, tuwa enom, gantung siwur, kabeh anggota Palang Merah kepengin mbantu sing lagi sengsara. Pitulung sing ora baen-baen kanggone sing lagi kenang musibah. Kuwe mau tugas kiprahe organisasi Palang Merah.
Ana tembung Remaja, yaa wis genah lamone remaja kuwe bocah nom, umur-umuran 11 nganti 17 tahun. Bocah nom perlu banget dewulang dasar-dasar urip mulya, urip sing ana gunane kanggo wong liya. Mulane Palang Merah melu lan kudu ngrumat bocah nom supaya duwe jiwa relawan sing peng-pengan.
Nah siki wis genah apa sing demaksud karo PMR. Palang Merah Remaja yakuwe bocah-bocah nom sing melu gregah temandhang gawe bareng karo organisasi Palang Merah, nyiapna awak supaya dadi wong sing duwe jiwa sosial, ikhlas nulung sepadha-padhane.
Nang SMPne nyong PMR kuwe kegiatan ektrakurikuler wajib kanggo bocah klas wolu. Latihane saben dina Kemis, sewise bubar sekolah. Pesertane yaa jan akeh wara, sekang kelas 8A nganti 8H. Angger wis pada kumpul kabeh, kegiatan PMR labuh, demolaih. Ana bocah telu sing kon maring ngarep, perlune kon mimpin ngucapna Tujuh Prinsip Palang Merah, ngucap Tri Bakti PMR, terusan sing siji kon dadi dirijen mimpin lagu Mars PMI. Ora kelalen pembinane mimpin ndonga, supaya kabeh pada waras, bregas, onana alangan apa-apa sedurunge, dong lagi kegiatan, nganti bar kegiatan, muga-muga pada slamet sehat olih pitulung sekang Gusti Allah.
Angger acara pembukaan wis rampung terus delanjutna kegiatan inti PMR. Kaya sing dewaca neng Tri Bhakti PMR. Inyong bocah-bocah dewulang supaya duwe ketrampilan urip sehat lan bisa tulung-tinulung.
Kegiatan sing ana sambung rapete karo keterampilan hidup sehat kuwe werna-werna. Contone dewulang wisuh sing bener, adus, ngasokna awak, uga kudu bisa mbagi wektu sing bener. Seurunge mangkat sekolah yaa adus disit terus sarap, mangan esuk, ben mengko neng sekolahan ora mambu lengur karo maning dadi ora kencoten. Polah yaa sing bener, ora olih ngrokok, ora kena mendem, ora olih nginum mabuk-mabukan. Njajal narkoba ora olih, njajal thok bae ora olih apamaning nyandu, jaan delarang temenan! Nganggo narkoba jelas kenang pasal kriminal sing akhire bisa detangkep polisi lan mesthi deukum!
Kegiatan sing khas PMR jelas dewulangna contone: Balut membalut, masang spalek, nulung wong semaput, nulung wong keperang, nulung wong sing kena musibah nganti balunge retak utawa tugel, kesiram wedang lan liyane maning. Dewulang gawe dlahbar sekang karung goni utawa kandi. Gunane teyeng nggo gotong korban. Dlahbare SMP-ne nyong sederhana ora sah ngetokna duit akeh, pengin ngerti bahan lan carane gawe dlahbar, bahane cukup kandi loro, gunting, lan pring loro sing dawane siji setengah meter. Cara gawene ya kuwe kandi sing loro sing pucuke teksih rapet dibolongi nganggo gunting, bar kuwe pringnge dilebokna maring kandi sing wis dibolongi mau, terus bocahan kon pada gawe.
Lah sing gandheng cenenge karo Tri Bakti sing keloro, berkarya dan berbakti di masyarakat, yaa jelas ana. Neng penginyongan sok dejenengi bakti sosial utawa bhakti masyarakat.
Inyong pada dekon ngresiki dalan, dalan cilik tangga sekolah debresihi, de saponi. Wangan kon deresiki, bujur, gedebogan, sterofom bekas wadah TV, terus runtah de singkirna sekang kalen mburi sekolahan. Kuwe gunane supaya banyune miline lancar. Ngumpulna beras karo mie instan yaa tau. Debagekna maring tukang becak karo sing rawat dalan. Inyong pada yaa dewulang bab Ayo Siaga Bencana. Gole mulang degawe kaya drama, critane ana lindhu gedhe pas guru lagi mulang neng kelas. Bocah-bocah debagi, sekelompok ana bocah rongpuluhan. Bocah siji sing kon dadi guru lagi mulang. Liyane dadi murid njagong ngrungokna sing lagi mulang. Angger krungu sempritan kuwe tandane ana gempa bumi. Maen pisan koh, jian kaya ana lindhu temenan. Guru lagi nerangna, ijig-ijig ana lindhu gedhe. �Umpetan!� gurune njerit, prentah muride kon umpetan nang ngisor meja. Saking manute nganti ana sing kejedhug meja. Bar rampung lindhu-lindhuan pada gemuyu kabeh.
Kanggo ngraketna gole padha bathiran kaya Tri Bhakti PMR sing ketelu �Mempererat Persahabatan Nasional dan Internasional�, pembinane inyong gawe dolanan sing nyenengna. Biasane seprapat jam sedurunge bubar acarane seneng-seneng nyanyi, polah sing lucu-lucu, seregu kudu kompak. Dong dolanan pingsut model Samson-Delilah, seregu kudu rukun, bareng lan ora slentha.
Gemiyen karo wingi dong evaluasi PMR lah jan seregu kudu raket temenan sebab meh kabeh kudu delakoni bareng-bareng. Saben regu kon nembang Mars PMI. Banjur kon nggawa korban nganggo dlahbar, manjat-mudun pereng sing kemiringanne kayane patang puluh drajat. Nggawa korban nganggo dlahbar mlodos brug, najan kaline ora pati gedhe nanging kathok karo sepatune inyong sekanca tetep padha teles kejebes. Penilaiaan sing kudu kompak yakuwe kon gawe tenda ponco, tenda sekang jas udan. Aja kelalen, madhang bareng-bareng seregu kejaba wareg uga bisa ngraketaken kanca batir.
Kuwe mau cerita bab kegiatan PMR neng SMPne nyong sing ana sambung rapete karo Tri Bakti PMR. Muga-muga ana manfaate kanggo rika kabeh. Pangapuntene nek ana omongane nyong sing salah lan gawe lara ati. Moga-moga sih langka. Tuku kupat neng Jumbara, angger lepat nywun ngapura.
Manuk emprit klayabah sawah,
Sawah perek dalan akeh sing butuh,
Wabilahit taufik wal hidayah,
Wa�alaikumsalam warahmatulallahi wabarakatuh
Kaya kuwe bae, matur nuwun!
Klilan!
Demikian artikel tentang JAWA BANYUMASAN ini dapat kami sampaikan, semoga artikel atau info tentang JAWA BANYUMASAN ini, dapat bermanfaat. Jangan lupa dibagikan juga ya! Terima kasih banyak atas kunjungan nya.
